It Fryske folksliet is it liet "De Alde Friezen".

"De Alde Friezen" is skreaun troch Eeltsje Halbertsma (1797-1858), en foar it earst publiseare yn de twadde printinge fan "De Lapekoer fen Gabe Skroor", yn 1829. De melodije is fan "Vom hoh'n Olymp", dat Halbertsma faaks leard hat yn de tiid dat er studint wie yn Heidelberg. It wie opnaam yn de earste printinge fan Rimen en Teltsjes, yn 1871. Doe't yn 1875 yn Grou in monumint foar Eeltsje Halbertsma oprjochte waard, waard dit liet songen ta syn neitins, en dat wie doe as wie dat in folksliet. Op foarspraak fan Jelle Troelstra is it yndie dat jier noch troch it Selskip foar Fryske Taal- en Skriftekenisse oannaam as `Frysk Folksliet'.

It liet wie yn 1876 opnaam yn de earste printinge fan "It Lieteboek", letter "Frysk Lieteboek". Jacobus fan Loon wie in redakteur fan "It Lietboek", en hy brocht it tal fan fersen werom fan sân nei fjouwer. It earste en it lêste fers binne oernaam hast sa't Halbertsma se skreaun hie, mar dêrtuskenyn binne mar twa oare fersen opnaam; oanpaste ferzjes fan it sechde en fyfte fers. It is disse ferzje dy't al gau populêr wurden is, en no as it Frysk Folksliet beskôge wurdt.